بەڕێز ئەبو بەکر محمد ئەمین
کاتێک سەرۆکوەزیران عەلی زەیدی ئۆپەراسیۆنە بەناوبانگەکەی “بەرەبەیان” ی دەستپێکرد و بە زرێپۆشەکانی دژە-تیرۆر چووە ناو ناوچەی سەوزەوە بۆ گرتنی ٤٧ پەرلەمانتار و بەرپرسی گەورە ، زۆر کەس وایانزانی کە کۆتایی بە گەندەڵی دەهێنێت لە عێراقدا . ڕاگەیاندنی دەستگیرکردنی کەسایەتییەکانی وەک عەلی مەعارج (بریکاری وەزارەتی نەوت) و موسەننا سامەڕائی و ئەوانی تر، لەگەڵ دەستبەسەرداگرتنی دەیان ملیۆن دۆلار و ملیاران دیناری کاش کە لە کێڵگە و کۆشکەکاندا شاردرابوونەوە ، بێگومان دیمەنێکی هۆلیوودیی زۆر سەرنجڕاکێش بوو بۆ شاشەکان. زەیدی بەوپەڕی حەماسەتەوە ڕایگەیاند کە ئەمە “تەنها قۆناغی یەکەمە” و هیچ “هێڵێکی سوور” بۆ سزادانی گەندەڵکاران نییە. بەڵام ئەگەر بە چاوی شیکارییەکی تەنزئامێز و ڕەخنەگرانە بڕوانینە ئەم شانۆگەرییە، دەبێت بپرسین: ئایا بەڕاستی گەندەڵی کۆتایی هاتووە، یان تەنها وادەی گرێبەستی “دزە کۆنەکان” بەسەرچووە و دەسەڵات خەریکی دامەزراندنی “دزە نوێیەکان”ە بە ئەزموون و مۆدێلی تازەترەوە؟
لە واقیعدا، عێراق وڵاتێکە کە تێیدا گەندەڵی تاوان نییە، بەڵکو “سیستەمی کارپێکردن”ـە کە دەوڵەتی لەسەر وەستاوە. کاتێک زەیدی ڕایدەگەیەنێت کە ئەم هەڵمەتەی لەسەر بنەمای دانپیادانانەکانی عەدنان جومەیلی (کە خۆی تۆمەتبارێکی سەرەکییە و ٢٣ ملیۆن دۆلار و ٧٠ خانووی لێ گیراوە) ئەنجام داوە ، ئەمە پێمان دەڵێت کە دەزگاکانی دەوڵەت خۆیان کوێرن و تەنها کاتێک دزەکان دەدۆزنەوە کە دزەکانی تر بڕیار دەدەن یەکتری بفرۆشن! گرتنی چەند سەرکردەیەکی دیار، کە زۆربەیان سەر بە باڵەکانی محەممەد شیاع سوودانی و ڕکابەرەکانی ترن ، زیاتر لە “پاکتاوکردنی حیساباتی سیاسی” دەچێت تا چاکسازییەکی نیشتمانی. ئاخر کام چاکسازی کاتێک سیستەمی بانکی و تاپۆ و گرێبەستەکان وەک خۆیانن و تەنها دەموچاوەکان دەگۆڕدرێن؟ ئەم ئۆپەراسیۆنەی زەیدی ڕێک وەک ئەوە وایە بەرنامەیەکی کۆمپیوتەریی ڤایرۆساوی ئەپدەیت بکەیت؛ ڤایرۆسەکان نەمردوون، بەڵکو تەنها فێربوون چۆن لە ڤێرژنی نوێدا باشتر خۆیان بشارنەوە. تا ئەو کاتەی پەرلەمان و حیزبەکان خۆیان خاوەنی کۆمپانیاکانی بەڵێندەرایەتی و بڕیاردەری سەرەکی بن، ئەم جۆرە هەڵمەتانە تەنها ڕیکلامێکی کاتییە بۆ بێدەنگکردنی شەقام و ڕازیکردنی ئەمریکا ، و چەند مانگێکی تر دەبینین کە “دزە ئەپدەیتکراوەکان” بە هەمان شێوەی پێشوو، بەڵام بە شارەزاییەکی زیاترەوە، دەست دەکەنەوە بە تاڵانکردنی وڵات.