ڕێبەر عومەر
کاتێک دەسەڵاتدارانی هەرێمی کوردستان لەبەردەم مایکرۆفۆنی میدیا بیانییەکان و کۆنفرانسە نێودەوڵەتییەکاندا قسە دەکەن، هەمیشە وێنەی هەرێمێکی پڕ لە ئازادی، فرەڕەنگی، و دیموکراسی دەکێشن؛ وڵاتێک کە گوایە بووەتە پەناگەیەک بۆ ئازادیی ڕادەربڕین لە ڕۆژهەڵاتی ناوەڕاستدا. بەڵام کاتێک سەیری واقیعی سەر زەوی دەکەیت، ئەو تابلۆ جوانە ڕاستەوخۆ دەدڕێت و چیرۆکێکی ترسناک دەردەکەوێت. کەیسی مانەوەی شێروان شێروانی لە زینداندا، تەنها دۆسیەی ڕۆژنامەنووسێک نییە کە لە پشت شیشەکانەوەیە؛ ئەمە ئاوێنەیەکە کە ڕوخساری ڕاستەقینەی ئازادیی ڕادەربڕین لەم هەرێمەدا نیشان دەدات. لە بری ئەوەی پێنووسەکان ببنە هۆکارێک بۆ هۆشیارکردنەوەی کۆمەڵگا و ڕاستکردنەوەی هەڵەکانی حکومەت، لێرە بوونەتە مەترسییەک کە دەبێت بە “پاساوی یاسایی” بێدەنگ بکرێن. کاتێک ڕۆژنامەنووسێک دەبێتە هێمایەک بۆ پرسی ئازادی لەناو زیندانەوە، ئیتر دروشمەکانی دەسەڵات لەسەر دیموکراسی تەنها دەبنە قسەی سەر کاغەز.
حکومەت و لایەنگرەکانی بەردەوام پاساوی ئەوە دەهێننەوە کە دەبێت ڕێز لە بڕیارەکانی دادگا بگیرێت و پرۆسە یاساییەکان سەروەر بن. بەڵام هاوڵاتیی سادە و چالاکوانان زۆر باش دەزانن کە لە سیستەمێکدا کە دادگاکانی بە تەواوی سەربەخۆ نین و زۆرجار سێبەری دەسەڵاتی حیزبییان بەسەرەوەیە، “سەروەریی یاسا” دەبێتە تەنها چەکێک بۆ سزادانی نەیارەکان. کاتێک یاسا ناتوانێت لێپرسینەوە لەو بەرپرسانە بکات کە ملیۆنان دۆلار و ملیاران دینار دەدزن و پارەی گشتی تاڵان دەکەن، بەڵام دەتوانێت بە خێراییەکی سەرسوڕهێنەر بڕیاری زیندانیکردن بۆ ڕۆژنامەنووسێک دەربکات لەسەر وتەیەک یان ڕەخنەیەک، ئیتر خەڵک بۆی هەیە بپرسێت: ئایا ئەمە یاسایە بۆ پاراستنی کۆمەڵگا، یان قەڵغانێکە بۆ پاراستنی بەرژەوەندییەکانی دەسەڵات؟ بەکارهێنانی دادگاکان بۆ کپکردنی دەنگی جیاواز، نەک هەر متمانە بە دەسەڵاتی دادوەری دەکوژێت، بەڵکو خودی چەمکی دادپەروەریش دەکاتە گاڵتەجاڕی.
پرسیارە جەوهەرییەکە ئەوەیە: ئایا هەرێمێک دەتوانێت بانگەشەی بوونی دامەزراوەی دیموکراسی بکات، لە کاتێکدا ڕۆژنامەنووسان و ڕەخنەگرەکانی هەست بە پارێزراوی ناکەن بۆ بەگژداچوونەوەی دەسەڵاتداران؟ دیموکراسی تەنها بە کردنەوەی چەند کەناڵێکی تەلەفزیۆنی و هەبوونی سندوقی دەنگدان ناپێورێت؛ دیموکراسی بەو پانتاییە دەپێورێت کە هاوڵاتییەک یان ڕۆژنامەنووسێک دەتوانێت بە ئازادی و بێ ترس ڕەخنە لە لوتکەی دەسەڵات بگرێت. تا ئەو کاتەی زیندانەکان شوێنی پێنووسە تیژەکان بن و کۆشکەکانیش شوێنی تاڵانکەران، هەرێمی کوردستان ناتوانێت خۆی وەک مۆدێلێکی ئازاد بفرۆشێت. ئازادییەک کە لە ترسی وشەیەک بلەرزێت، ئازادی نییە، بەڵکو قەفەزێکی گەورەیە کە تەنها دەرگاکەی کراوەتەوە تا پێمان بڵێن ئێوە ئازادن، بەڵام ئەگەر بفڕن، باڵەکانتان دەشکێنین!