شوان عبدالرحمن حارس
مەترسیدارترین قۆناغێک کە ڕەنگە کۆمەڵگەیەک لە سایەی حوکمڕانییەکی ناکارامەدا پێیدا تێپەڕێت، تووڕەیی و خۆپیشاندان و ناڕەزایەتی دەربڕین نییە، بەڵکو بێباكیی و نائومێدیی ڕەهایە؛ قۆناغێک کە تێیدا خەڵک چیتر تووڕەش نابن، چونکە بە تەواوی باوەڕیان بە سەرتاپای پرۆسەکە و گۆڕانکاری لەدەستداوە.
لە کوردستانی ئەمڕۆ و بە تایبەتی لە سایەی کابینەکەی مەسرور بارزانیدا، بنبەستی سیاسی و درێژەکێشانی ناکۆکییە حزبییەکان جۆرێک لە «ماندووبوونی دەستەجەمعی» و شەکەتییان لێبۆتەوە؛ هاوڵاتییان چیتر چاوەڕێی دەستکەوتی سیاسی، ڕێککەوتنی نوێ یان بڕیاری پەرلەمان ناکەن، چونکە فێرکراون هەر شوێنێک دەسەڵاتی تێدا بێت، بێهودەیی و بێواڵامیی لێدەکەوێتەوە. کاتێک جەماوەر دەگاتە ئەو بڕوایەی کە هیچ هەڵبژاردنێک، هیچ گۆڕانکارییەکی دەستەڵات و هیچ گوتارێکی چاکسازی ناتوانێت تاریکیی ماڵەکانیان و قەیرانی بژێوییان چارەسەر بکات، بێدەنگییەک جێگەی تووڕەیی دەگرێتەوە کە زۆر مەترسیدارترە لە هەر ئاڵۆزییەکی شەقام. دەسەڵاتداران ڕەنگە ئەم بێدەنگییە و بێباکییەی کۆمەڵگە بە «سەقامگیری یان ئارامی» لێکبدەنەوە و شانازیی پێوە بڕازێننەوە،
بەڵام ئەمە کاتژمێرێکی دروستکراوی تەقینەوەیە؛ کاتێک هیوای گشتی بە تەواوی دەکوزرێتەوە، پەیوەندیی کۆمەڵایەتی لەگەڵ سیستمی سیاسیدا بەیەکجاری دەپچڕێت و وڵاتەکە دەبێتە جەستەیەکی بێگیان کە تێیدا هاوڵاتی تەنها هەوڵی ڕزگارکردنی کەسیی خۆی دەدات، چی بە کۆچکردن بێت یان بە داخران بەڕووی واقیعدا. کۆتایی ئەم داڕمانە دەروونییەی نەتەوەیەک، حەقیقەتێکی زەقمان دەخاتە بەردەست کە مێژوو سەلماندوویەتی: گورزپێكەوتنی هەرە گەورە بەر ئایندەی هەرێمێک، نەبوونی دەستوور یان بنبەستی دانوستانەکان نییە، بەڵکو کوژاندنەوەی دوا ترووسکەی هیوایە لە دڵی هاوڵاتییاندا—چونکە سیستەمێک کە خەڵکەکەی نائومێد بکات، پێش ئەوەی بەدەستی نەیارەکانی بڕوخێت، لەناو ڕۆحی هاوڵاتییانی خۆیدا ڕووخاوە.