کۆشکی کرێملین نیگەرانی قووڵی خۆی لە تێکچوونی دۆخی کەنداو دەربڕی و هیوای خواست دانوستانەکان بەردەوام بن بۆ ئەوەی ڕێگری لە هەر لێکەوتەیەکی نەرێنی بکرێت.
دمیتری بیسکۆف، وتەبێژی کرێملین، ڕایگەیاند” دۆخی ناوچەکە “ناجێگیر و لەرزۆکە” و مۆسکۆ هەموو هەوڵێک دەدات بۆ ئەوەی ناوچەکە بەرەو سیناریۆیەکی سەربازی مەترسیدار نەچێت.”
بیسکۆف ڕوونی کردەوە کە ڕووسیا لە ئێستادا وەک “نێوەندگیر” لە دانوستانەکاندا کار ناکات، بەڵام جەختی لەوە کردەوە کە وڵاتەکەی لەسەر هێڵە و ئامادەیە لە ئەگەری داواکردنی هەر هاوکارییەکدا، کار ئاسانی بۆ گەیشتن بە چارەسەری ئاشتییانە و ڕێککەوتنی کۆتایی بکات.
وتەبێژی کرێملین ئاماژەی بەوە کرد کە هەر ململانێیەکی سەربازی لە ناوچەکەدا، تەنیا کاریگەری لەسەر ئاسایشی ڕۆژهەڵاتی ناوەڕاست نابێت، بەڵکو دەبێتە هۆی لێکەوتەی زۆر خراپتر بۆ سەر ئابووری جیهان. مۆسکۆ پێیوایە سەقامگیریی ئەم ناوچەیە پەیوەندییەکی ڕاستەوخۆی بە بازاڕەکانی وزە و ئاسایشی دارایی نێودەوڵەتییەوە هەیە.
لە کۆتایی لێدوانەکانیدا، بیسکۆف ئاماژەی بە دۆخی تەنگەی هورمز کرد و بە “ناجێگیر” و “پێشبینینەکراو” وەسفی کرد. ڕووسیا پێیوایە کە هەستیاریی ئەم ناوچەیە وا دەخوازێت لایەنەکان بە دانایی مامەڵە بکەن بۆ ئەوەی دۆخەکە لە کۆنترۆڵ دەرنەچێت و کاریگەری لەسەر گواستنەوەی دەریایی نێودەوڵەتی دروست نەکات.
رووسیا
ئێران
ئەمریکا