وەزارەتی دەرەوەی عێراق نیگەرانیی قووڵی خۆی لە بەردەوامیی ئاڵۆزییەکانی تایبەت بە ئاسایشی کەشتیوانیی دەریایی لە ناوچەکەدا دەربڕی و هۆشداریدا لە لێکەوتەکانی ئەم دۆخە لەسەر تێکدانی سەقامگیریی هەرێمی و پەکخستنی بازرگانیی جیهانی.
ئەمڕۆ یەکشەممە ١٢ی تەممووزی ٢٠٢٦، وەزارەتی دەرەوەی عێراق لە ڕاگەیەنراوێکدا ڕایگەیاند” بەردەوامیی گرژی و پێشهاتە ئەمنییەکان کاریگەریی نەرێنی دەکەنە سەر ئاسایشی دەریایی و دەبنە هۆی دروستکردنی ئاستەنگ بۆ جموجۆڵی بازرگانیی نێودەوڵەتی.”
وەزارەتی دەرەوە جەختی لەسەر گرنگیی پابەندبوون بە بنەماکانی یاسای نێودەوڵەتی، پەیماننامەی نەتەوە یەکگرتووەکان، ڕێزگرتن لە سەروەریی وڵاتان و بنەمای هاوسێیەتیی باش کردووەتەوە؛ هاوکات داوای دوورکەوتنەوە لە هەر ڕێوشوێنێک دەکات کە ببێتە هۆی زیاتر پەرەپێدانی ئاڵۆزییەکان یان زیانگەیاندن بە ئاسایش و سەلامەتیی کەشتیوانیی دەریایی لە ناوچەکەدا.
لە کۆتایی ڕاگەیەنراوەکەدا، وەزارەتی دەرەوەی عێراق داوای گرتنەبەری ڕێگەی دیالۆگ و ئامرازە دیپلۆماسییەکان دەکات بۆ چارەکردنی ناکۆکییەکان و پشتڕاستی دەکاتەوە کە عێراق پاڵپشتی لە تەواوی ئەو هەوڵانە دەکات کە ئامانجیان کەمکردنەوەی گرژییەکان و پاراستنی بەرژەوەندییە هاوبەشەکانی گەلانی ناوچەکەیە.
وەزارەتی دەرەوەی عێراق
ئەمریکا
ئێران