بەهۆی قەرەباڵغی لە یەکێک لە بنکەکانی دەنگدانی قەرەهەنجیر گرفت دروستبووە و دەرگای بنکەکە بەڕووی هێزە ئەمنییەکان داخراوە.
بە پێی زانیارییەکان بەهۆی دروستبوونی قەرەباڵغی و زۆری دەنگدەر لە بنکەیەکی دەنگدانی تایبەت لە قەرەهەنجیر گرفت دروستبووە و دەنگدەران ناتوانن بە ئاسانی دەنگ بدەن.
تاوەکو ئێستا کێشەکە چارەسەر نەکراوە، هەر بۆیە دەرگای بنکەی دەنگدان بەڕووی هێزە ئەمنییەکان داخراوە.
ئەمڕۆ یەکشەممە ٩ی تشرینی دووەمی ٢٠٢٥ ، دەنگدانی تایبەت بۆ هەڵبژاردنی پەرلەمانی عێراق ئەنجام دەدرێت، ڕۆژی سێشەممەش ١١ی تشرینی دووەمی ٢٠٢٥ پرۆسەی دەنگدانی گشتی لە سەرتاسەری عێراق بەڕێوەدەچێت.
بە وتەی جومانە غەلای، زیاتر لە ملیۆنێک و ٣٠٠ هەزار کەس لە رۆژی دەنگدانی تایبەت مافی دەنگدانیان هەیە.
لە هەڵبژاردنی ئەمساڵ، حەوت هەزار و ٧٦٨ بەربژێر کێبڕکێ لەسەر ٣٢٩ کورسی پەرلەمانی عێراق دەکەن، کە پێنج هەزار و ٥٢٠ بەربژێرییان پیاو و دوو هەزار و ٢٤٨ـیان ژنن، لە کۆی ٤٦ ملیۆنی دانیشتووانی عێراقیش تەنیا نزیکەی ٢١ ملیۆن دەنگدەر مافی دەنگدانیان هەیە، لەکاتێکدا نزیکەی حەوت ملیۆن کەس ناتوانن بەشداری دەنگدان بکەن، بەهۆی نوێنەكردنەوەی زانیارییەكانیان.
هەڵبژاردن
پەرلەمانی عێراق