ئیسرائیل لە گوندێکی سنووری سووریا هەوڵی دروستکردنی بنکەیەکی ڕاهێنان دەدات و نەخشەی شوێنەکەش لە گوندێکی لوبنان وەرگیراوە.
بەپێی ڕۆژنامەی يديعوت أحرونوت-ی عیبری، سوپای ئیسرائیل، بنکەیەکی ڕاهێنانی نوێی لەسەر گوندی زاعورە لە باکووری بەرزاییەکانی جۆلان دروست کردووە و ناوی لێناوە دامەزراوەی لوبنان.
بەپێی ڕۆژنامەکە، سوپای ئیسڕائیل ئەم بنکەیە بە گوندێکی باشووری لوبنان دەشوبهێنێت و بە مەبەستی ئامادەکاری و ڕاهێنانی هێزەکانی بۆ هەر ڕووبەڕووبوونەوەیەکی زەمینیی ئەگەری دروست کراوە.
ڕۆژنامەکە ئاماژەی بەوەشکردووە، بنکە نوێیەکە بە باکووریی غەززەی بچووک دادەنرێت و لە دەیان باڵەخانە پێکدێت کە بەرزییان لە نێوان یەک نهۆمەوە تا چوار نهۆم دەبێت و دیزاینی هەندێکیان لە شێوازی خانووی لوبنانی وەرگیراوە. لە ماوەی دوو هەفتەی ڕابردوودا، بۆ یەکەمجار سەربازانی لیوای کۆماندۆ لەم بنکەیەدا ڕاهێنانیان ئەنجام داوە.